Cefnogaeth Leol, Gweithredu Lleol, Llwyddiant Lleol
Gobeithiwn y bydd y safle hon yn rhoi cyfle i chwi ddysgu mwy am ein gwaith ym Môn. Os dymunwch, gall hefyd roi cyfle i chwi gefnogi'n gadarnhaol i warchod a chynnal y wiwer goch ar yr ynys.
Mae cefnogaeth leol wedi bod yn amhrisiadwy yng nghadwraeth y wiwer goch frodorol. Poblogaeth y gwiwerod coch ym Môn yw'r ail fwyaf yng Nghymru, a dyma'r unig boblogaeth sydd â chyfle i fodoli heb y gwiwerod llwyd. Ym Môn hefyd mae'r unig goedwig lydanddail ble y ceir gwiwerod coch sy'n bridio. Ydych chi eisiau darganfod mwy am wiwerod coch Môn?
Wel, mae'n rhwydd, cliciwch ar y dolennau a llywiwch drwy'r safle.
Neges o gefnogaeth gan Iolo Williams – Cyflwynydd ac Arbenigwr ar Fywyd Gwyllt
‘ Rydw i'n cofio fod gwiwerod coch yn gyffredin o amgylch fy nghartref ym mhentref Llanwddyn yng ngogledd Sir Drefaldwyn ond pan fydda i'n dychwelyd y dyddiau yma, dydw i'n gweld dim ond gwiwerod llwyd. Rydw i wedi dilyn llwyddiant prosiect Gwiwerod Coch Môn gyda diddordeb mawr am ei fod mor galonogol i weld y gwiwerod coch yn dod yn ôl. Diolch i ymroddiad rhai unigolion, mae modd gweld ein gwiwer gynhenid unwaith eto mewn sawl coedwig ym Môn ac yn y pen draw mi fyddwn i'n hoffi gweld y gwiwerod llwyd yn cael eu difodi o Brydain i gyd. Mae'n annhebygol y bydd hyn yn digwydd yn ystod fy oes i ond gyda'r gwaith ym Môn yn mynd o nerth i nerth, o leiaf mae yna rywfaint o obaith ar gyfer yr oes a ddêl.'
Y Newyddion Diweddaraf
Mae'r torllwyth cyntaf o wiwerod coch a aned yn Niwbwrch yn ystod 2005 wedi eu diddyfnu.
Gwelwyd tair gwiwer ifanc
ar 10fed Mawrth eleni mewn blwch nythu yn agos i'r fan ble rhyddhawyd y gwiwerod coch. Roedden nhw tua chwech i saith wythnos oed ac erbyn hyn gwyddom eu bod wedi eu diddyfnu ddiwedd Mawrth. Y llynedd diddyfnwyd y torllwyth cyntaf o wiwerod coch ifanc yn nechrau Mai ac felly cawsom ein synnu o weld y rhai ifanc wedi datblygu cystal erbyn dechrau Mawrth. Yn 2004, ganed cyfanswm o 23 o wiwerod coch yn y goedwig a gobeithiwn y bydd 2005 hefyd yn flwyddyn dda.
Lluniau diweddaraf o'r safle rhyddhau
Bydd y Cyfeillion yn codi blychau nythu a hopranau bwyd ychwanegol yng nghoedwigoedd Niwbwrch a Mynydd Llwydiarth yn ystod y misoedd nesaf. Cyhoeddir y dyddiadau ar ein tudalennau
Digwyddiadau – felly cofiwch edrych yn rheolaidd!
